Muzikë

ZËRI TOKËSOR I HYJNORES

ZËRI TOKËSOR I HYJNORES

In memoriam: Nexhmije Pagarusha (Bilbili i Kosovës)

Mehmetali Rexhepi

dridhjet e melosit të zërit të Asaj

nuk i bartte vargu i mbeti vetëm lakmia

kurse ajo piqej e digjej në zilinë e paprekshme

në çdo shteg i rrëzonte ledhet melodia

pellgjet e mallëngjimit nuk futeshin në hejbe

se si hejzave rriteshin rrjedhat

më tej të grishte zëri i magjishëm i “Bareshës”

doemos t`ia mbash andej kahes së Hyjnores

*

nuk e ndalte asgjë kumtin për prarimin e ëndjes

duhej t`i hysh notit pa e pasur në mendje

Ajo t`i abstragon rënkimet ankesat

vloi e derdhej tambli mbi furnelë

“ E duhur jam” kumbonte melodia

në daç hap dritaren në daç mos e hap

erë-shkrumbi se shthurë këngën

kënga shtrihet sipërore në çdo çap

*

nuk e ndaloi dot zemra

ku është e ku nuk është

për ta kapur shtytjen e fortë

tingujt e trëndafilave pa gjemba

fëshfërimë lisash e malesh plis-bardha

violinave fyejve kumbime fushës

u frynte zëri melhem i Nexhmije Pagarushës

*

Ajo ditës i dha ngjyrat që nuk i kishte

sikur i tha

ua shartova faqet vetullat sytë Rozafave Tanusheve

pas tetëdhjetë e gjashtë Shën Gjergjash

gërdallat e mia i dorëzohen dheut

në Akademinë e Bukurisë ua lash modelin

traktatin e ligjërimit për bilbilat

*

krojeve të dashurisë “Lulëzoi fusha”

kori i bilbilave harlisej prirë nga Nexhmije Pagarusha

kostumet më të bukura i vishje rinisë sime nuse

ku nuk më shpinin ato melodi enigmave të galdimeve

lotët e këngëve Tua pigmente të blerta bari

të falemi o zëri Hyjnor i Arbërisë

shpaloje bukurinë e sythave pranveror të shpirtit

dhe spërkatja e zërit Tënd zbuste egërsinë

Gjilan, më 7 shkurt 2020

You Might Also Like