Katër solistë Besa Krasniqi, Dea Xhemaili, Liridon Sadriu dhe Egzona Gërvalla nga Studio Operistike Prishtina kanë mbajtur një koncert solistik në Bibliotekën Ndërajonale “Fan S. Noli” në Gjilan. Ata i kanë emocionuar të pranishmit duke interpretuar pjesë nga operat e njohura të kompozitorëve botërorë e kosovarë. Udhëheqëse artistike e këtij koncerti ishte Merita Juniku, e cila e ka bërë dhe përgatitjen vokale, kurse solistët janë shoqëruar në piano nga Valton Beqiri.
Solistët kanë interpretuar pjesë nga “Carmen” i Georges Bizet, “Mrika” e Prenk Jakovës, “Suor Angelica” nga Giacomo Puccini, “La Traviata” dhe “Rigoletto” të Giuseppe Verdi, “La Favorita” e Gaetano Donizetti dhe “Cavalleria Rusticana” e Pietro Mascagni.
Paraqitjet e Besa Krasniqit, mezzosoprano, Egzona Gërvallës, soprano, Dea Xhemajlit, mezzosoprano dhe Liridon Sadriut, tenor, janë pëlqyer shumë nga publiku, i cili u ka duartrokitur gjatë.
